Blair boðar lagaskriðu

Tony Blair, forsætisráðherra Bretlands, kynnti í gær áform um uppstokkun á breska velferðarkerfinu, virka baráttu gegn hryðjuverkum og upptöku persónuskilríkja sem Bretar hafa verið án frá því í síðari heimsstyrjöld, í löggjafaráætlun ríkisstjórnar hans við upphaf þriðja kjörtímabilsins. Er víst talið að sum löggjafaráformin muni espa innanflokksandstæðinga Blairs til andófs og reynast prófsteinn á forystustyrk hans í flokknum, en eins og kunnugt er hefur hann farið þverrandi frá því deilurnar um Íraksstríðið upphófust. Samkvæmt áætlun stjórnarinnar hyggst hún koma 45 lagafrumvörpum í gegnum þingið á næstu 18 mánuðum. Blair sagði við þingsetninguna að með áætluninni væri staðinn vörður um efnahagslegan stöðugleika, fjárfestingu í skólakerfi og sjúkrahúsum landsins yrði haldið áfram og "borgararnir verndaðir fyrir hryðuverkum og glæpum". Um hin umdeildu áform um upptöku persónuskilríkja sagði Blair að nútíminn kallaði á að slíkt kerfi yrði tekið upp í nafni öryggis borgaranna.