Fyrir rétti vegna Beslan-árásar

Réttarhöld hófust í dag yfir tsjetsjenskum skæruliða sem tók þátt í árásinni á grunnskólann í Beslan á síðasta ári þar sem 330 manns létust, aðallega konur og börn.  Nur-Pashi Kulayev er tuttugu og fjögurra ára og var sá eini af árásarmönnunum þrjátíu sem lifði áhlaup rússneska hersins á grunnskólann. Íbúar Beslan fundu hann eftir áhlaupið og drógu út úr felustað sínum. Litlu mátti muna að íbúar tækju hann af lífi í hefndarskyni fyrir ættingja sína og vini sem létust í skólahúsinu en honum var bjargað af rússneskum sérsveitarmönnum. Kulayev hefur lýst því yfir að árásin hafi verið gerð að undirlagi tsjetsjensku leiðtoganna Shamil Basayevs og Aslans Maskhadovs í því skyni að efna til allsherjarstríðs í Kákasus-héruðunum. Basayev hefur síðar gortað sig af því að hafa skipulagt árásina en Maskhadov fordæmdi hins vegar árásina og sagðist engan þátt hafa átt í henni. Maskadov var tekinn af lífi af rússneskum hermönnum fyrr á árinu en Basayev gengur enn laus. Saksóknari fer fram á lífstíðarfangelsi yfir Kulayev fyrir hans þátt í þessu hryðjuverki. Ættingjar fórnarlambanna hafa fagnað því en krefjast þess líka að spilltir embættismenn verði dregnir til saka fyrir sinn þátt, meðal annars landamæraverðir sem árásarhópurinn mútaði til að komast leiðar sinnar.