Arsenal sigraði Liverpool

Einn leikur fór fram í ensku úrvalsdeildinni í dag er Arsenal tók á móti Liverpool á heimavelli sínum Highbury í London í dag, lokatölur urðu 3-1. Liverpool liðið virtist annars hugar í fyrri hálfleik og gengu leikmenn Arsenal á lagið og skoruðu tvö mörk. Það fyrra gerði Robert Pires beint úr aukaspyrnu en Jose Reyes gerði það síðara. Allt annað Liverool lið kom inná í síðari hálfleik og náðu þeir að minnka muninn með marki frá fyrirliðanum Steven Gerrard eftir aukaspyrnu á 51. mínútu. Liverpool sótti meira eftir það, án þess þó að skapa sér mikið af færum. Undir lok leiksins innsiglaði svo Spánverjinn Francesc Fabregas 3-1 sigur Arsenal en þá gleymdu gestirnir sér í sókninni. Eftir þessi úrslit er ljóst að Liverpool á ekki lengur möguleika á að ná fjórða og síðasta Meistaradeildarsætinu, en þeir eru sex stigum á eftir Everton en eiga bara einn leik eftir.