Stjórnin stendur tæpt

Verkamannaflokkurinn hefur 66 sæta meirihluta í breska þinginu en úrslit bresku þingkosninganna lágu endanlega ljós fyrir í gær. Sá meirihluti gæti reynst ríkisstjórninni of naumur til að koma umdeildum málum í gegn. Endanlegar lyktir bresku þingkosninganna eru þær að Verkamannaflokkurinn fékk 356 þingsæti, íhaldsmenn 197, frjálslyndir demókratar 62 og aðrir flokkar 30. Kosningu í syðra Staffordskíri var frestað um mánuð þar sem einn frambjóðendanna andaðist á lokaspretti baráttunnar. Greining dagblaðsins The Independent á úrslitunum sýnir að þeir stjórnarþingmenn sem ekki lutu flokksaga á síðasta kjörtímabili voru endurkjörnir í nægilega ríkum mæli til að geta fellt umdeild stjórnarfrumvörp í þinginu. 66 sæta meirihluti er því afar tæpur fyrir Tony Blair. Tveir af fjórum nýjum ráðherrum í ríkisstjórninni, þeir Des Brown, ráðherra innflytjendamála, og Douglas Alexander, Evrópumálaráðherra, eru mjög handgengnir Gordon Brown, fjármálaráðherra. Það þykir til marks um að Blair muni víkja fyrir Brown fyrr en síðar.