Bush skammar Sharon

George W. Bush Bandaríkjaforseti hvatti Ariel Sharon, forsætisráðherra Ísraels, til að hætta við áform sín um að stækka landnemabyggðir gyðinga á Vesturbakkanum. Leiðtogarnir hittust á búgarði Bush í Texas í gær og var hann haldinn í því augnamiði að styrkja Sharon í viðleitni hans í að leggja niður landnemabyggðir á Gaza-ströndinni. Gagnrýni Bush varð hins það sem mesta athygli vakti enda sjaldgæft að ekki sé samhljómur á milli leiðtoga Bandaríkjanna og Ísraels. Ísraelar áforma að bæta 3.650 húsum við stærstu landnemabyggð sína á Vesturbakkanum, Maaleh Adumim, en því leggjast Bandaríkjamenn gegn þar sem frekari uppbygging stefnir friðinum í hættu og brýtur auk þess í bága við ákvæði vegvísisins svonefnda. Sharon sagði eftir fundinn að hann væri sammála Bush um inntak vegvísisins en sagði engan vafa leika á að sumar landnemabyggðirnar væru hluti af Ísraelsríki og það væri réttur Ísraelsmanna að stækka þær byggðir. Báðir sögðu þeir að leiðtogar Palestínumanna yrðu að taka hryðjuverkamenn fastari tökum.