Segja mótmæli Japönum að kenna

Mótmæli og óeirðir í Kína um helgina eru Japönum að kenna, segja stjórnvöld í Peking, sem sögð eru hafa leyft mótmælin. Stjórnmálaskýrendur segja það geta komið í bakið á ráðamönnum. Mótmælin hafa vakið mikla athygli enda er vægast sagt sjaldgæft að fjölmenn mótmæli séu leyfð í Kína. Um helgina létu þó þúsundir illa í Peking, Chengdu, Guanzhou og Shenzhen og var ekki að sjá að óeirðalögregla gerði neitt til að stöðva lætin. Útibú japanskra fyrirtækja, japanskir veitingastaðir og fleira fengu að kenna á reiði Kínverja vegna nýrrar japanskrar kennslubókar þar sem Kínverjum finnst dregið úr frásögnum af grimmdarverkum Japana í seinni heimsstyrjöldinni, en í Peking segja stjórnvöld að Japanar hafi drepið 35 milljónir Kínverja í heimsstyrjöldinni. Fréttaskýrendur segja óeirðirnar ekki eins handahófskenndar og halda mætti. Stjórnvöld hafi í raun stjórn á framvindunni og sjái sér hag í að leyfa mótmælendum að láta ófriðlega. Ástæðan er sú að Kínverjar vilja koma í veg fyrir að Japanar fái fast sæti í Öryggisráði Sameinuðu þjóðanna. Mótmælin gætu komið í bakið á stjórnvöldum í Peking, að mati sumra stjórnmálaskýrenda. Þeir segja að með þessum hætti sé óánægðum og óróaseggjum leyft að hamast gegn útlendingum en að lítið þurfið til að óánægja með ástandið innanlands blandist í lætin og þá gæti það reynst afdrifaríkt. Kínversk yfirvöld kveðast ekki bera neina ábyrgð á látunum um helgina heldur sé það einvörðungu Japönum að kenna hvernig samskiptum landanna er fyrir komið. Þeir verði að leggja sig fram við að bæta skaðann sem kennslubókin umdeilda hefur valdið.