Og lifðu hamingjusöm til ...

Rúmlega þrjátíu ára ástarsaga fékk farsælan endi rétt fyrir hádegi þegar Karl Bretaprins og Camilla Parker Bowles gengu í hjónaband.   Brúðkaupið átti að halda í gær en því var frestað vegna útfarar páfa. Í því er sagt kristallast ólánið í tengslum við samband Karls og Camillu sem urðu ástfangin fyrir þrjátíu og fjórum árum. Camilla er stóra ástin í lífi Karls. Þau hittust fyrst á Póló-leik árið 1971 þegar hann var tuttugu og tveggja ára og hún tuttugu og þriggja. Þau áttu í ástarsambandi í tvö ár en svo fór að hún giftist herforingja og eignaðist með honum tvö börn. Karl kvæntist aftur Díönu Spencer og eignaðist með henni tvo syni. Bæði skildu, eins og frægt er orðið, og hafa þurft að berjast við almenningsálitið sem hefur ekki verið hliðhollt Camillu eftir frásagnir Díönu prinsessu af því að Camilla hafi í raun verið þriðji aðilinn í hjónabandi þeirra Karls. Götur Windsor eru nú fullar af fólki sem freista þess að berja brúðhjónin augum. Rétt fyrir hálf tólf óku þau saman frá Windsor-kastala að ráðhúsinu þar sem athöfnin fer nú fram. Camilla var klædd hvítri dragt með barðastóran hvítan hatt. Fjölmiðlar fengu ekki að sýna frá athöfninni en þangað var aðeins boðið 30 gestum, nánustu aðstandendum brúðhjónanna. Nú rétt fyrir fréttir gengu hjónin út úr ráðhúsinu í Windsor, athöfninni lokið og þau gengin í hjónaband. Elísabet drottning, móðir Karls, og maður hennar voru ekki viðstödd athöfnina en koma hins vegar í átta hundruð manna veislu sem haldin verður eftir á í Windsor-kastala þar sem brúðhjónin verða blessuð. Meðal titla Karls er prins af Wales og því liggur beint við að eiginkona hans sé prinsessan af Wales. Camilla verður hins vegar hennar konunglega hátign Hertogaynjan af Cornwall sem er annar titill Karls, en sýnu lægri. Hún verður þó næsttignasta konan í fjölskyldunni, sett ofar systur Karls, Önnu prinsessu. Camilla fær þó ekki titilinn drottning, ef og þegar Karl tekur við konungdómi.