Blair vill bjarga Rover

Breska ríkisstjórnin lagði á það áherslu í gær að hún væri að gera allt sem í hennar valdi stæði til að afstýra gjaldþroti MG Rover bílaverksmiðjanna, í von um að afstýra með því að kjósendur refsuðu henni fyrir meint aðgerðarleysi í þingkosningunum 5. maí. Um 6.000 störf eru í hættu í Rover-bílaverksmiðjunni í Longbridge í Mið-Englandi, en kjördæmin á því svæði eru vettvangur harðvítugrar baráttu um þingsætin. Bæði Íhaldsflokkurinn og Frjálslyndi flokkurinn gera sér vonir um að vinna þar sæti af Verkamannaflokki Tony Blair. Stjórnin hefur sett efnahagsmál á oddinn í kosningabaráttunni; hún hreykir sér af lítilli verðbólgu, minna atvinnuleysi og lágu vaxtastigi. Ekki var ljóst hve mikinn pólitískan mat stjórnarandstöðuflokkarnir kynnu að gera sér úr vandamálum MG Rover. En endanlegt gjaldþrot síðasta breska fyrirtækisins sem fjöldaframleiðir bíla gæti vakið neyðarlegar spurningar um stöðu bresks iðnaðar.