Ólöf áfram í evrópsku mótaröðinni

Ólöf María Jónsdóttir var rétt í þessu að ná besta árangri sem íslenskur kylfingur hefur náð þegar hún komst í gegn um niðurskurðinn á Tenerife-mótinu í golfi, sem er liður í Evrópumótaröðinni. Ólöf lék á tveimur höggum undir pari í dag og lauk keppni á öðrum keppnisdegi um kaffileytið á 2 höggum yfir pari samanlagt. Hún er í 40.-46. sæti eftir tvo hringi en niðurskurðurinn í dag miðaðist við 4 högg yfir pari og því glæsilegur árangur hjá Ólöfu. Velska stúlkan Eleanor Pilgrim er efst á 7 undir pari og Ludivine Kreutz frá Frakklandi kemur næst á 6 undir pari. Næsti hringur verður leikinn á morgun. Ólöf átti erfitt uppdráttar í byrjun móts, en hefur vaxið ásmegin eftir að líða tók á keppnina og lék á 70 höggum í dag, eftir að hafa leikið á 76 höggum í gær. Þetta kemur fram á vef Víkurfrétta, sem fylgist grannt með mótinu á Spáni.