Próflaus á stolnum bíl

Rúmlega þrítugur maður var dæmdur í fimm mánaða fangelsi fyrir að stela bíl við Barónsstíg í Reykjavík og aka um borgina. Hann hafði áður verið sviptur ökuréttindum. Ökuferðin endaði í Breiðholti, en til að komast inn í bílinn braut maðurinn í honum hliðarrúðu.

Dómurinn, sem er skilorðsbundinn í tvö ár, var kveðinn upp í Héraðsdómi Reykjavíkur í byrjun vikunnar. Með brotinu rauf maðurinn skilorð dóms frá því í sumar, en þá var hann dæmdur í þriggja mánaða skilorðsbundið fangelsi. Bílnum stal hann 13. júní, fimm dögum eftir að sá dómur var kveðinn upp. Auk fangelsisrefsingarinnar var manninum gert að borga 200.000 króna sekt.