Afhenti trúnaðarbréf og kom á framfæri vonbrigðum íslenskra stjórnvalda

Stefán Haukur Jóhannesson, sendiherra, afhenti nýlega, José Manuel Barroso, forseta framkvæmdastjórnar Evrópusambandsins, trúnaðarbréf sitt sem sendiherra Íslands hjá Evrópusambandinu. Sendiherra og forseti framkvæmdastjórnarinnar ræddu almennt um samskipti Íslands og ESB og vék Stefán Haukur að nýgerðum tvíhliða samningi Noregs og Evrópusambandsins um skiptingu veiða úr norsk íslenska síldarstofninum. Sendiherra kom á framfæri vonbrigðum íslenskra stjórnvalda með það að ESB og Noregur skuli hafa horfið frá frekari tilraunum til að ná strandríkjasamkomulagi um veiðarnar fyrir árið 2006.