Heimsóknir í fyrirtæki

Ólafur Ragnar Grímsson forseti Íslands hefur lagt mikið uppúr stuðningi við íslensk fyrirtæki í Kínaferð sinni, eins og í mörgum fyrri ferðum. Hann fagnaði í dag undirritun 15 milljóna dollara samnings um viðhald á 11 Boeing 747 flugvélum Atlanta og Avion Group. Samningurinn kemur í framhaldi af 5 ára viðhaldssamningi milli Atlanta og Ameco, sem er fyrirtæki í eig Air China og Lufthansa. Samningurinn var kynntur í stærsta flugskýli Asíu að viðstöddum framámönnum í kínverskum flugmálum. Forsetinn skoðaði einnig samstarfsaðila Össurar hf í Kína á sviði stoðtækjasmíði, en fyrirtækið hefur hug á að sækja enn frekar inn á þann markað. Össur hefur verið í samstarfi við landslið Kínverja í Olympíuleikum fatlaðra. Á leikunum 2004 unnu tólf kínverskir keppendur búnir stoðtækjum frá Össuri verðlaun, þaraf átta gull. Þá heimsótti forsetinn samstarfsaðila Medcare-Flögu á svefnrannsóknadeild Chaoyang sjúkrahússins í Beijing og opnaði loks nýja verslun Oasis, sem er tískuverslunarkeðja undir hatti Mosaic samstæðu Baugs Group. Það var Dorrit Moussaieff sem lýsti verslunina formlega opna, en einnig voru á staðnum eigendurnir Jón Ásgeir Jóhannesson og Ingibjörg Pálmadóttir.