LÍ styður reykingafrumvarp

Stjórn Læknafélags Íslands styður eindregið það frumvarp sem Siv Friðleifsdóttir, þingmaður Framsóknarflokksins, hefur ásamt öðrum þingmönnum lagt fram um breytingar á lögum um tóbaksvarnir. Stjórn Læknafélagsins tók málið til umræðu á fundi sínum í gær og styður málið þar sem sú lagabreyting sem um ræðir tryggir starfsmönnum veitingahúsa þá vinnuvernd sem þeir hafi farið á mis við vegna gildandi undanþáguákvæða um vinnustaði þeirra. Læknafélag Íslands telur að engin málefnaleg rök séu til þess að þetta starfsfólk njóti lakari vinnuverndar en aðrir landsmenn.