500 milljarða halli í sjö ár

Steingrímur J. Sigfússon, formaður Vinstri grænna, telur óumflýjanlegt að grípa til aðgerða í efnahagsmálum, meðal annars vegna uppsagna og gjaldþrota í samkeppnis- og útflutningsgreinum sem blæði vegna hágengis krónunnar. Illræmd ruðningsáhrif stóriðjustefnunnar yrðu til þess að hundruð starfa töpuðust á móti tiltölulega fáum störfum sem fylgdu nýrri stóriðju. Steingrímur bendir meðal annars á að samanlagður viðskiptahalli áranna 2003 til 2010 er áætlaður um 500 milljarðar króna. Hreinar skuldir þjóðarbúsins næmu nú 135 prósentum af vergri þjóðarframleiðslu og væru hærri en nokkru sinni fyrr. Steingrímur vill að ríkisstjórnin gefi út yfirlýsingu um að ekki verði ráðist í frekari stóriðju fram til ársins 2012. Í öðru lagi vill hann að þeim tilmælum verði beint til Fjármálaeftirlitsins að huga að áhættumati í bankakerfinu og viðbrögðum við hugsanlegu snöggu gengisfalli krónunnar. Hann nefndi í því sambandi að kaup á skuldabréfum í íslenskum krónum næmu nú alls um níutíu milljörðum króna. Í þriðja lagi gerir tillagan ráð fyrir að Seðlabankinn hreyfi við bindiskyldu bankanna eða öðrum lögmætum aðgerðum til að efla stöðugleikann. Þá er í fjórða lagi gert ráð fyrir að skattalækkunum verði frestað af hálfu ríkisstjórnarinnar en beitt verði aðgerðum til að bæta hag hinna lægst launuðu. „Ég tel að hér sé ekkert óskaplegt hættuástand,“ sagði Halldór Ásgrímsson forsætisráðherra, sem varð fyrir svörum á Alþingi. Hann þvertók fyrir að banna frekari stóriðju næstu árin enda samrýmdist það ekki leikreglum í samskiptum stjórnvalda og atvinnulífsins. „Ætti að banna frekari stækkun álversins á Grundartanga?“ spurði­ Halldór. Halldór taldi að þegar væri farið að hægja á útlánum. Seðlabankinn teldi ekki fýsilegt að beita aukinni bindiskyldu banka til þess að slá á þenslu enda gætu þeir tekið lán að vild erlendis.