Spara tugþúsundir í matarinnkaupum

Um 33 þúsund krónum minna færi í matarinnkaup hjá meðalfjölskyldu á ári, ef matarskatturinn verður lækkaður úr fjórtán prósentum í sjö. Meðalfjölskyldan eyðir rúmum 44 þúsund krónum í mat á mánuði, samkvæmt tölum frá Hagstofunni. Samtals rúmlega rúmri hálfri milljón á ári. Inni í þeirri upphæð er 14% virðisaukaskattur á matvæli, hinn svokallaði matarskattur. Lengi hefur verið rætt um að lækka hann; nú síðast tók Ingibjörg Sólrún Gísladóttir, formaður Samfylkingarinnar, málið upp um helgina en hún vill lækka þennan skatt, úr fjórtán prósentum í sjö. Um þetta ætti að geta verið sátt, enda kveðið á um það í ríkisstjórnarsáttmálanum að endurskoða eigi virðisaukaskattinn með það í huga að bæta kjör almennings. Þetta getur varla þýtt annað en lækkun. Heildartekjur ríkissjóðs af virðisaukaskatti eru rúmir eitt hundrað milljarðar á ári. Þar af nemur matarskatturinn á sjöunda milljarði króna. Lækkun úr 14% í sjö þýðir því um 3 til 3,5 milljarð í minni tekjur fyrir ríkið samkvæmt upplýsingum frá Hagstofu og Ríkisskattstjóra.