Ófrjósemisaðgerðum fjölgar

Þeim karlmönnum sem láta gera á sér ófrjósemisaðgerðir hefur fjölgað mikið á undanförnum árum. Karlar eru um fjörutíu prósent þeirra sem fara í ófrjósemisaðgerðir. Fyrir fimmtán árum var hlutur karla um fimm prósent. Að sögn Sigríðar Haraldsdóttur hjá heilbrigðistölfræðisviði Landlæknisembættisins fóru 262 karlmenn í slíka aðgerð árið 2003 en 365 konur. Guðjón Haraldsson þvagfæraskurðlæknir segir að ekkert lát sé á þróuninni og að hún  einskorðist ekki við Ísland því víða sé þetta hlutfall jafnvel mun hærra en hér á landi, til dæmis í Bandaríkjunum. Guðjón segir að hugsanlega megi rekja þessa þróun til þeirrar vitundarvakningar sem á sér stað um að aðgerðin sé mun áhættuminni hjá körlum. „Hjá konum er þetta í raun kviðarholsaðgerð sem gerð er á nokkuð hættusömu svæði en hjá körlunum er um frekar litla aðgerð að ræða og mun hættuminni. Svo tel ég að þessa aukningu megi einnig rekja til jafnréttisviðhorfa sem sífellt verða meira áberandi í þjóðfélaginu.“ Hann segir þá karla sem gangast undir aðgerðirnar alls ekki einsleitan hóp. „Þetta eru karlmenn úr öllum stéttum en ef eitthvað er hægt að segja til að skilgreina þennan hóp frekar þá eru þetta yfirleitt menn yfir 35 ára sem eiga fyrir tvö, þrjú eða fleiri börn og hafa tekið þá ákvörðun með sínum förunauti að eignast ekki fleiri börn.“ Guðjón segir að líta verði á ófrjósemisaðgerðir á körlum sem varanlega aðgerð þó hægt sé að endurtengja þá aftur. „En þó menn séu endurtengdir lokast fljótt fyrir farveg frumnanna aftur svo þeir verða orðnir ófrjóir aftur yfirleitt innan hálfs árs,“ útskýrir hann og bætir við að nokkur dæmi séu um það að karlar séu endurtengdir og eignist síðan börn. Hann ítrekar að menn verða ekki ófrjóir strax að ófrjósemisaðgerð lokinni og nefnir þar eitt erlent dæmi þar sem maður vildi kanna árangurinn þegar hann kom heim að aðgerð lokinni og uppskar tvíbura eftir tilraunina.