Brot á samkeppnislögum

„Sálfræðingar hafa barist fyrir því að komast inn í sjúkratryggingakerfið síðan 1976, frá því að lög um þá voru sett,“ segir Halldór Kr. Júlíusson, formaður Sálfræðingafélags Íslands. Samkeppniseftirlitið hefur nú úrskurðað að sú ákvörðun að semja ekki við klíníska sálfræðinga um greiðsluþátttöku ríkisins í kostnaði sjúkratryggðra gangi gegn markmiðum samkeppnislaga. Ákvörðunarorðin eru svohljóðandi: „Sú ákvörðun heilbrigðisyfirvalda að semja ekki við klíníska sálfræðinga um greiðsluþátttöku hins opinbera í kostnaði sjúkratryggðra af geðheilbrigðisþjónustu hefur skaðleg áhrif á samkeppni og fer gegn markmiði samkeppnislaga nr. 44/2005, sbr. 1. gr. laganna.“ Á grunni samkeppnislaga beinir Samkeppniseftirlitið þeim fyrirmælum til Jóns Kristjánssonar heilbrigðis- og tryggingamálaráðherra að hann sjái til þess að gengið verði til samninga við sjálfstætt starfandi klíníska sálfræðinga um greiðsluþátttöku hins opinbera í kostnaði sjúkratryggðra við geðheilbrigðisþjónustu klínískra sálfræðinga. Halldór segir að sigur sé ekki í höfn fyrr en búið sé að skrifa undir samning. Ráðuneytið hafi fjórar vikur til að taka ákvörðun um hvort það vísi málinu til áfrýjunarnefndar samkeppnisráðs. En sálfræðingar hafi fulla ástæðu til bjartsýni með svo skýra niðurstöðu sem raun ber vitni.