Tekið út á 2-3 mínútna fresti

Færslur á kortareikningi karlmanns sem telur að sér hafi verið byrluð ólyfjan á nektarstað sýna að tekið hafi verið út af kortinu hans á tveggja og þriggja mínútna fresti. Hann hyggst kæra málið til lögreglu. Maðurinn eyddi rúmlega 160 þúsund krónum á staðnum án þess að muna annað en að hafa pantað einn einkadans. Þegar kortanóturnar eru skoðaðar kemur í ljós að sumar úttektirnar eru gerðar á tveggja og þriggja mínútna fresti: Klukkan 3.42 og svo aftur 3.44. Klukkan 4.38 og svo aftur klukkan 4.41. Þetta þykir hjónunum sýna að tekið hafi verið út af kortinu í heimildarleysi, enda sé ómögulegt að kaupa einkadans á tveggja eða þriggja mínútna fresti þar sem dansinn varir í a.m.k. þrjár mínútur. Þau segjast ætla að kæra málið til lögreglu á mánudag. Komið hefur fram að tvær kærur hafi borist til lögreglunnar í Kópavogi vegna svipaðra mála. Ásgeir Davíðsson, eigandi Goldfinger, hefur hins vegar marghaldið fram að ekkert sé til í þessum ásökunum, um sé að ræða menn sem þori ekki að viðurkenna fyrir eiginkonum sínum í hvað peningarnir raunverulega fóru. Ásgeir sagði í þættinum Íslandi í bítið í gær að maðurinn væri að sækjast eftir því að fá afslátt, og bætti við að honum fyndist það svakalegt ef að menn geti komið í sjónvarpið, en umræddur maður var í viðtali á Stöð 2 í fyrradag, og sagt að Jón Jónsson úti í bæ sé þjófur og aumingi og ræni fólk.