Geir Haarde tekur við formennsku

Geir H. Haarde utanríkisráðherra tekur við formennsku í Sjálfstæðisflokknum, stærsta stjórnmálaflokki landsins, á lokadegi landsfundar hans í dag. Geir verður áttundi formaður flokksins, sem stofnaður var 1929. Hann tekur við embætti af Davíð Oddssyni sem gegndi því í rúm fjórtán ár. Geir hefur verið varaformaður Sjálfstæðisflokksins frá mars 1999 og verður kosið um eftirmann hans á landsfundinum í dag. Kristján Þór Júlíusson bæjarstjóri á Akureyri og Þorgerður Katrín Gunnarsdóttir alþingismaður og menntamálaráðherra hafa gefið kost á sér til starfans en samkvæmt lögum Sjálfstæðisflokksins eru allir flokksmenn í kjöri. Kosning varaformanns hefst á landsfundinum klukkan 15. Í dag verður einnig kjörið til miðstjórnar, stjórnmálaályktun verður afgreidd og lýkur fundi með ræðu nýs formanns.