Funda eftir helgi

Vilhjálmur H. Vilhjálmssson hæstaréttarlögmaður segir að honum hafi ekki enn borist neitt svar um skaðabótakröfu þá, sem Reykjavíkurborg krefst að olíufélögin Ker, Olís og Skeljungur, greiði vegna samráðs sem þau höfðu við tilboðsgerð á vegum borgarinnar árið 1996. Reykjavíkurborg krefur Olíufélögin um samtals 151 milljón króna í skaðabætur vegna samráðsins. Vilhjálmur, sem fer með málið fyrir borgina, segir að ekki hafi enn borist neitt svar frá olíufélögunum en þau hafi daginn í dag til að bregðast við skaðabótakröfunni. Vilhjálmur segir að krafan sé gerð á hendur allra olíufélaganna þar sem olíufélögin hafi haft samráð sín á milli og Reykjavíkurborg sé ekki kunnugt um hvernig olíufélögin skiptu hagnaðinum. Vilhjálmur segir að olíufélögin hafi óskað eftir viðræðum um málið eftir helgi. Hann segir vilja til viðræðna að hálfu borgarinnar og reynt verði að leysa málið. Fundurinn eftir helgi mun ráða framhaldinu en ef samkomulag náist ekki, muni dómstólar verða að skera úr í málinu.