Engin kona forstjóri skráðu félagi

Engin kona er forstjóri í skráðu fyrirtæki í Kauphöll Íslands og konur eru aðeins sjö komma fjögur prósent stjórnarmanna. Nefnd, sem Valgerður Sverrisdóttir iðnaðar- og viðskiptaráðherra skipaði, hefur kynnt tillögur um hvernig fjölga megi konum í stjórnum fyrirtækja. Nefndin leggur til að farvegur fyrir umræðu og þekkingaröflun verði tryggður, reglulega verði birtur listi með upplýsingum um fjölda og hlutfall kvenna í stjórnum, tengsl kvenna innbyrðis og við karla verði efld, leitarskilyrði og sjóndeildarhringur við skipan í stjórnir verði víkkaður, fyrirtæki verði hvött til að setja konur á dagskrá og karlar í áhrifastöðum fengnir til að gera málið að sínu. Þetta kom fram á blaðamannafundi hjá viðskiptaráðherra í morgun. Þar kom einnig fram að Íslendingar standa jafn illa og jafnvel verr en helstu nágrannaþjóðir hvað hlutfall kvenna í forystu fyrirtækja varðar. Norðmenn standa þó best en konur eru tæp 22 prósent stjórnarmanna þegar 500 stærstu fyrirtækin eru skoðuð. Íslendingar standa verst norðurlandaþjóða með rúm ellefu prósent þegar fimm hundruð stærstu fyrirtækin eru skoðuð. Fjörug umræða hefur verið meðal hinna norðurlandaþjóðanna um hvort tryggja eigi konum setu í stjórnum með lagasetningu og hafa Norðmenn þegar sett slík lög. Á fundinum í morgun kom fram að Íslendingar hefðu verið mótfallnir lagasetningu til að rétta hlut kvenna en Þóranna Jónsdóttir, höfundur skýrslu um Aukin tækifæri kvenna í forystu atvinnulífsins, segir Íslendinga hafa verið mótfallna lagasetningu. Hún heyri hins vegar aukinn vilja í þá átt að skoða hvort ekki þurfi að beita handafli til að fá viðhorfsbreytingu fram. Valgerður Sverrisdóttir viðkskiptaráðherra kvaðst mótfallin lagasetningu en ekki útiloka að hún skipti um skoðun á síðari stigum ef hægt miðaði í jafnréttisátt en Þór Sigfússon, forstjóri Viðskiptaráðs og formaður nefndarinnar, var algjörlega mótfallinn lagasetningu.