Góð þátttaka í hugmyndasamkeppni

Skilafrestur alþjóðlegrar hugmyndasamkeppni um uppbyggingu miðbæjarins á Akureyri rann út á þriðjudaginn. Alls bárust 140 hugmyndir víðs vegar að úr heiminum og segir Ragnar Sverrisson, talsmaður verkefnisins, að aldrei hafi fleiri hugmyndir borist í samkeppni af þessu tagi á Íslandi. Verkefnið ber heitið Akureyri í öndvegi en það er fjármagnað af 13 fjársterkum fyrirtækjum með starfsemi á Akureyri. Ragnar segir kostnaðinn kominn í um 40 milljónir króna en þar af er verðlaunafé í hugmyndasamkeppninni um átta milljónir króna. "Ein helsta ástæða þess að svo margir sendu inn hugmyndir í keppnina er að ráðgjafarfyrirtækið Alta kom að verkefninu strax í upphafi og því hefur verið staðið faglega að málum allan tímann. Við vorum að vonast eftir um 30 hugmyndum en áhuginn fór fram úr vonum bjartsýnustu manna,"segir Ragnar. Úrslit í keppninni verða kunngerð 14. apríl og viku síðar fer fram verðlaunaafhending. Í kjölfarið verður haldin á Akureyri sýning á öllum hugmyndunum 140.