Íslandsmótið í badminton í gær

Skemmtilegu Íslandsmeistaramóti í badminton lauk í gær og segja má að þau Helgi Jóhannesson og Ragna Ingólfsdóttir úr TBR hafi verið sigurvegarar mótsins, því þau unnu bæði tvöfalt, bæði í einliða- og tvíliðaleik karla og kvenna. Ragna vann tvíliðaleikinn ásamt Söru Jónsdóttur og Helgi varð Íslandsmeistari í annað sinn í gær þegar hann sigraði í tvíliðaleik karla ásamt Brodda Kristjánssyni. Í tvenndarleik voru það systkinin Tinna Helgadóttir og Magnús Ingi Helgason úr TBR sem sigruðu glæsilega eftir æsilegan úrslitaleik við Helga Jóhannesson og Rögnu Ingólfsdóttur. Við náðum tali af Helga eftir að hann sigraði í einliðaleiknum, þar sem hann bar sigurorð af meistara síðasta árs, Tryggva Nielsen."Ég byrjaði ekkert að æfa að neinu viti fyrr en eftir áramótin síðustu. Ég var í skóla og hafði þess vegna ekki mikinn tíma til að æfa, en ég var alveg að hlaupa og lyfta og þannig lagað. Eftir áramótin hef ég hinsvegar verið að æfa alla daga og hef gert mikið af því að spila. Ég stefndi að því að toppa á þessu móti núna og það heppnaðist prýðilega. Ég átti alveg eins von á að ná að vinna í einliðaleiknum og það er í raun allt búið að ganga upp hjá mér um helgina. Sjálfstraustið var í fínu lagi og ég var bara að leika fínt badminton. Mér tókst að vera ákveðinn og þora að gera það sem ég lagði upp með, sem gekk allt upp, þannig að þetta gekk eins og í sögu. Leikirnir í dag voru mjög erfiðir og það má eiginlega segja að þetta hafi verið mjög erfitt mót. Það er því enn sætara að vinna þegar maður er í svona harðri keppni allt mótið," sagði Helgi. Ragna Ingólfsdóttir sigraði þriðja árið í röð í einliðaleik kvenna og við spurðum hana hvernig hún færi að því að vinna svona ár eftir ár. "Ég er búin að vera að æfa íþróttina síðan ég var 9 ára gömul og ég spilaði mjög mikið við bróður minn, sem gerði það að verkum að ég hafði alltaf mjög harða samkeppni. Mér hefur farið þokkalega mikið fram í ár held ég og það sem er að hjálpa mér mikið eins og í þessari keppni er það að ég er komin með talsverða reynslu, þó að ég sé ekki gömul. Ég er ekkert stressuð núna þó að ég sé að fara í keppni og svona reynsla er að skila manni ansi langt, því ef maður er stressaður er maður fljótur að gera mistök og það er dýrt," sagði Ragna.