Alfreð vill fyrsta sæti Framsóknar

Búist er við því að framsóknarmenn velji fulltrúa sína á R-listann með flokksvali á kjördæmisþingi flokksins eða í prófkjöri en fleiri munu hallast að fyrrnefnda kostinum. Ekki er annað vitað en að Anna Kristinsdóttir borgarfulltrúi muni gefa kost á sér til áframhaldandi starfa fyrir flokkinn en Alfreð Þorsteinsson sagði í samtali við Fréttablaðið að hann gæfi kost á sér til forystu fyrir flokkinn í Reykjavík. Hann sigraði Önnu naumlega í flokksvali fyrir síðustu borgarstjórnarkosningar en búist er við því að þau muni bæði reyna ná efsta sætinu. Ef til flokksvals kemur hefur verið haft á orði að hafa svipaðan hátt á og hafður var þegar Framsóknarflokkurinn valdi fulltrúa sína fyrir síðustu alþingiskosningar í norðvesturkjördæmi. Þar var haldið svokallað tvöfalt kjördæmisþing. Þá velst sem fulltrúi á þingið einn fyrir hverja fimm félaga sem skráðir eru í hvert það félag sem starfandi er í kjördæminu. Þannig má segja að um einhvers konar útfærslu á prófkjöri sé að ræða en með þessu er markmiðið að reyna að koma í veg fyrir að fólki verði smalað í flokkinn og aðeins kjósi þeir sem stjórnir viðkomandi félaga hafi valið. Fulltrúar framsóknarmanna lögðu sjálfir fram tillögu um að hver hinna þriggja flokka fengi tvo fulltrúa í annað til sjöunda sæti listans en hinir yrðu valdir með öðrum hætti. Um slíkt mun verða nokkuð góð sátt innan raða framsóknarmanna og er ekki talið að þeir muni geta gert tilkall til borgarstjóraefnis listans. Viðræðunefnd R-listaflokkanna fundaði í fyrradag og var mest fjallað um málefnasamning milli flokkanna. Næsti fundur viðræðunefndarinnar verður haldinn á fimmtudaginn að viku liðinni.