Skipsbrotsmanni bjargað

"Það gekk bara mjög vel miðað við veður og aðstæður að koma honum um borð," segir Magnús Örn Einarsson, stýrimaður og sigmaður TF-LIF. "Hann treysti sér til þess að setja björgunarlykkjuna á sig sjálfur og við vorum ekki nema í fjórar mínútur yfir honum, þá var hann kominn til okkar." Skútan Vamos lenti í vandræðum þegar mastur hennar brotnaði í afleitu veðri um 90 sjómílur norðvestur af Vestfjörðum, um það bil mitt á milli Grænlands og Íslands. Skömmu eftir miðnætti fékk skútan á sig brotsjó, mastrið brotnaði og hún lagðist á hliðina með þeim afleiðingum að annar skipverja, skoskur að uppruna, féll fyrir borð. Hinn maðurinn, sem er bandarískur, gat lítið annað gert en að bíða eftir hjálp. Fyrsta neyðarkallið barst klukkan 2.17 aðfararnótt þriðjudags, en ekkert samband náðist við skútuna. Landhelgisgæslan kannaði skipaferðir á svæðinu og hafði samband við björgunarstöðvar í nágrannalöndunum til að fá upplýsingar um uppruna neyðarbaujunnar og skipaferðir. Björgunarstjórnstöðin í Norfolk í Bandaríkjunum gaf að lokum upplýsingar um skútuna, sem og að tveir menn væru um borð. Þá var haft samband við norskan línuveiðara sem var á veiðum á svæðinu, en hann gat ekkert aðhafst vegna aftakaveðurs. Vindhraði á svæðinu var um það bil 30 metrar á sekúndu, lélegt skyggni, haglél og 10 til 15 metra ölduhæð, að sögn norska skipstjórans. Fokker-vél Landhelgisgæslunnar, TF-SYN, mætti á svæðið ásamt þyrlunni þegar birti. Þær fundu skútuna skömmu eftir klukkan átta í gærmorgun, og leið manninum bærilega miðað við aðstæður, segir Magnús. Þegar búið var að hífa manninn um borð var leitað að félaga hans, en sú leit bar engan árangur.