Norrænn hópur vann

Áhersla er lögð á góða aðkomu, einfaldar tengingar bygginga og létt og vingjarnlegt yfirbragð þar sem vellíðan sjúklinga og starfsfólks er haft í fyrirrúmi, í tillögunni sem sigur bar úr býtum í samkeppni um nýtt deiliskipulag á lóð Landspítala -háskólsjúkrahúss. Hópur sem skipaður er íslensku arkitektastofunni Arkitektur.is, Verkfræðistofu Norðurlands, norsku verkfræðistofunni SWECO Grøner og dönsku arkitekta- og landslagsarkitektastofunum C.F. Møller og Schønherr Landskab, fór með sigur af hólmi í keppninni. Tillagan gerir ráð fyrir að um 85.000 fermetrar af nýbyggingum rísi á spítalalóðinni á árunum 2009 til 2018 auk þess að umtalsverðar endurbætur á að gera á eldri byggingu sjúkrahússins. Sjö tillögur kepptu, en niðurstaða dómnefndar var í gær kynnt heilbrigðisráðherra við hátíðlega athöfn í Öskju, náttúrufræðahúsi Háskóla Íslands. Gestir og gangandi geta skoðaða tillögurnar í anddyri Barnaspítala Hringsins frá og með deginum í dag til mánaðamóta. "Úrslitin og samkeppnin marka enn einn áfangann í því margþætta verkefni sem bygging nýs spítala fyrir alla landsmenn óneitanlega er," sagði Jón Kristjánsson, heilbrigðis- og tryggingamálaráðherra, við athöfnina í gær, en um átta mánuðir eru síðan ríkisstjórnin samþykkti tillögu hans um að halda áfram uppbyggingu Landspítala–háskólasjúkrahúss við Hringbraut. Forval var auglýst í byrjun febrúar og sóttu 18 fjölþjóðlegir hópar sérfræðinga um þátttöku í samkeppninni og var sjö stigahæstu boðið að keppa um skipulagið samkvæmt keppnislýsingu sem samin var af fulltrúum Landspítala – háskólasjúkrahúss, Háskóla Íslands og Framkvæmdasýslu ríkisins. Jón Kristjánsson lýsti því yfir að ekki væri eftir neinu að bíða varðandi áframhaldandi undirbúning eftir að ríkisstjórnin samþykkti nýverið að 18 milljarðar af söluandvirði Símans skyldu renna til byggingar á nýju sjúkrahúsi. Í áliti dómnefndarinnar kemur fram að einróma álit hennar sé að allar tillögur hafi verið athyglisverðar og mjög vel unnar, en vinningstillagan hafi verið besti kosturinn til nánari útfærslu á deiliskipulaginu. Hún 12 stigum hærri einkunn en næsta tillaga, eða samtals 92 stig af 100 mögulegum. "Gamla Hringbraut er færð upp að gamla spítalanum og er meginbyggingum spítalans komið fyrir sunnan hennar. Mælikvarði og hlutverk götunnar í skipulaginu er sannfærandi þar sem nýjar, jafnt sem eldri byggingar spítalans, raðast meðfram henni á látlausan hátt," segir í álitinu. Nefndin leggur svo til að gengið verði til samninga við vinningshafana um að þeir verði ráðgjafar Landspítala – háskólasjúkrahúss við áframhaldandi uppbyggingu spítalans. >