Meirihluti Íraka hyggst kjósa

Yfirgnæfandi meirihluti Íraka ætlar að mæta á kjörstað 30. janúar þrátt fyrir mannskæðar árásir vígamanna undanfarið, ef marka má skoðanakönnun sem unnin var fyrir bandarísku samtökin International Republican Institute. Samkvæmt henni segja fjórir af hverjum fimm kjósendum líklegt að þeir kjósi. Lítillega hefur þó dregið úr fjölda þeirra sem segja mjög líklegt að þeir kjósi. Í nýju könnuninni, sem var gerð í desember og janúar, segja 64 prósent mjög líklegt að þau kjósi, sjö prósentustigum minna en í nóvember. Enn ein mannskæð sprengjuárásin var gerð í Bagdad í gær. Þá var bílsprengja sprengd fyrir framan mosku sjíamúslima meðan fólk var við bænir. Í það minnsta fjórtán létust og 40 særðust í árásinni, að sögn lögreglu og starfsmanna sjúkrahúsa. Abu Musab al-Zarqawi, leiðtogi alræmdra hryðjuverkasamtaka, sendi frá sér upptöku þar sem hann fordæmdi sjíamúslima fyrir samstarf við bandaríska hermenn. "Þeir brutust inn í athvörf guðs, þeir svívirtu þau og hengdu upp myndir af djöfli sínum, al-Sistani," sagði hann. Ayatollah Ali al-Sistani er helsti leiðtogi sjíamúslima.