Aðkeypt sérfræðiaðstoð hefur tvöfaldast

Aðkeypt sérfræðiaðstoð ríkisstofnana og ráðuneyta hefur nærri tvöfaldast frá árinu 1998 samkvæmt úttekt ríkisendurskoðunar. Jóhanna Sigurðardóttir, þingmaður Samfylkingarinnar, telur nær að takmarka þessi útgjöld í stað þess að skera niður hjá þeim sem minnst hafa.

Jóhanna Sigurðardóttir, þingmaður Samfylkingarinnar, bað um úttekt á kostnaði vegna sérfræðiaðstoðar til handa ríkisstofnunum og ráðuneytum. Í skýrslu sem ríkisendurskoðun skilaði um málið kemur fram að aðkeypt sérfræðiþjónusta nam 2,7 milljörðum króna árið 1998 og tæpum 5,2 milljörðum árið 2003. Á þessu tímabili voru útgjöld vegna sérfræðiaðstoðar hátt í 22 milljarða króna.

Jóhanna hefur sent erindi til fjárlaganefndar vegna þessa og vonast hún til að reynt verði að bæta vinnubrögð og verklag hvað þennan þátt ríkisútgjalda varðar. Í gagnrýni ríkisendurskoðunar kemur fram að rágjafar sem fengnir eru til sérfræðiaðstoðar eru ekki alltaf hlutlausir. Því sé mikilvægt að tryggja að sá sem veitir ráðgjöfina hafi ekki fjárhagslegra hagsmuna að gæta.