Að lækka rafmagnsreikninginn

Þó rafmagnsreikningarnir séu ekki veigamestu útgjöld heimilanna kostar rafmagnið sitt. Stefán Gíslason, umhverfisstjórnunarfræðingur hjá Sambandi sveitarfélaga, segir hægan vanda að haga rafmagnsnotkun þannig að reikningurinn lækki.

"Fyrsta ráðið er að hafa rafmagnstæki ekki á "stand by" stillingunni. Á venjulegu heimili fara átta til þrettán prósent allrar raforku í tæki sem slökkt er á."

Stefán segir slík tæki leynast víða á heimilum, þekktust séu sjónvörp, myndbandstæki og DVD-spilarar en þetta eigi við um öll tæki sem í eru blikkandi klukkur eða týrandi rauð ljós. Og hann tekur dæmi af borðlampa sem eyðir tólf vöttum þegar slökkt er á honum og 25 vöttum þegar hann logar.

"Eitt vatt kostar 75 krónur á ári. Ef þessi lampi væri í sambandi allan ársins hring og aldrei kveikt á honum myndi það kosta 900 krónur á ári."

Þeim krónum mætti verja í eitthvað annað og betra. Stefán segir að þegar fólk kaupi sér raftæki sé mikilvægt að horfa ekki bara á verð tækisins heldur líka orkunotkun þess.

"Á sífellt fleiri tækjum er evrópsk orkumerking og það er hagkvæmast að kaupa A merkt tæki. Þó tækið kosti meira en annað orkufrekara er hægt að að vinna upp mismuninn og gott betur með lægri rafmagnsreikningi."

Hann hvetur líka fólk til að nota sparperur í stað hefðbundinna. "Þær eru reyndar miklu dýrari en nota aðeins einn sjötta eða einn sjöunda af því rafmagni sem hefðbundin pera þarf og að auki þarf að skipta mun sjaldnar um perur."

Að endingu nefnir Stefán mikilvægi þess að frystikistur séu hafðar í köldum geymslum fremur en hlýjum og hvetur fólk til að afþíða kistuna nokkrum sinnum á ári þar sem ísuð kista eyði miklu meira rafmagni heldur en kista sem er full af ís.