Molar dagsins

Joe Johnson, leikmaður Phoenix Suns, getur að öllum líkindum ekki leikið með liði sínu í þriðja leiknum við Dallas Mavericks í úrslitakeppninni vegna meiðsla og Jerry Sloan, þjálfari Utah Jazz mun halda áfram að þjálfa liðið næsta vetur eftir vangaveltur um að setjast í helgan stein. Joe Johnson meiddist í öðrum leik Phoenix og Dallas í nótt, þegar hann lenti bókstaflega á andlitinu eftir að hafa stokkið upp að körfunni. Hann brákaði bein í andliti sínu, rétt neðan við augað og sauma þurfti sex spor til að stöðva blæðinguna sem fylgdi í kjölfarið. Dómari leiksins dæmdi tæknivillu á Dallas og Johnson hitti úr öðru af tveimur vítaskotum sem hann fékk í kjölfarið, en var svo fluttur beint á sjúkrahús. Johnson mun fara í aðgerð vegna meiðslanna, en forráðamenn liðsins reikna með því að hann missi ekki meira úr en þriðja leikinn og verði því tilbúinn þegar liðin spila síðari leik sinn Dallas á sunnudag eða mánudag. Sloan áfram hjá Jazz Harðjaxlinn Jerry Sloan, sem lauk sínu 17. tímabili í þjálfarastólnum hjá Utah Jazz á dögunum, mun halda áfram hjá félaginu, eftir að hafa staðfest það á blaðamannafundi í Salt Lake City í dag. Enginn þjálfari í stærstu hópíþróttagreinunum í Bandaríkjunum hefur verið nálægt því eins lengi við stjórnvölinn hjá sama liðinu og Jerry Sloan. Hann er sjötti sigursælasti þjálfari í sögu NBA deildarinnar og mjög virtur meðal leikmanna og þjálfara. Árið í ár var honum þó ekki eftirminnilegt, nema ef vera skyldi vegna þess að það var hið fyrsta sem liðið er með taphlutfall síðan hann tók við þjálfuninni á sínum tíma og því höfðu margir verið að gera því skóna að hann myndi hætta í sumar. "Hérna vil ég vera og ég er þakklátur félaginu að vilja fá mig aftur, eftir öll töpin í vetur;" sagði hinn hógværi þjálfari á blaðamannafundinum.