Enginn beigur í friðargæsluliðum

Ekki er talin mikil hætta á, að árás verði gerð á íslensku friðargæsluliðana sem hefja störf í Afganistan í vikunni. Hópurinn verður við störf í landinu næstu fjóra mánuði. Íslensku friðargæsluliðarnir fara til Osló á miðvikudag og þaðan með norska hernum til Kabúl í Afganistan. Hópurinn sem nú fer utan verður á eftirlitsferðum í vesturhéruðum landsins. En eru menn nógu vel þjálfaðir til að þurfa hugsanlega að beita vopnum í Afganistan. "Ég tel það nú, en vonandi kemur aldrei til þess að við þurfum að nota vopnin. Ef það gerist erum við búnir að fá þá þjálfun sem til þarf," segir Garðar Forberg, yfirmaður í Íslensku friðargæslunni. Garðar segir friðargæslustörf aldrei hættulaus. Hinsvegar sé áhættumatið í vestur Afganistan lágt og lítil hætta á að ráðist verði á íslenska hópinn. "Það hefur verið róstursamt í Suður-Afganistan og líka í landamærahéruðunum við Pakistan. Svæðið sem við erum á er mjög afskekkt. Bæði í stríðinu við Sovétríkinu og borgarastríðinu sem fylgdi í kjölfarið var lítið um átök á þessu svæði," segir Garðar. "Við erum partur af mun stærra teymi. Við erum undir stjórn Litháa og það er um 200 manna sveit sem er í kringum þetta verkefni." Garðar segir engan beig í mönnum fyrir ferðina. "Við erum mjög spenntir að fara. Við erum búnir að fara í gegnum langan og strangan undirbúningsferil og menn eru mjög spenntir fyrir að komast af stað og komast í þetta verkefni."