Viðræður í uppnámi

"Það ríkir að mínu mati stöðnun í þessum viðræðum og jafnvel afturför," segir Össur Skarphéðinsson, þingmaður Samfylkingarinnar í utanríkismálanefnd. "Viðræðurnar eru nánast á upphafsreit," segir Steingrímur J. Sigfússon, formaður Vinstri grænna, en hann óskaði eftir fundi í utanríkismálanefnd ásamt Þórunni Sveinbjarnardóttur, Samfylkingunni, þegar viðræðufundur um framtíð varnarsamningsins fór út um þúfur í Washington í síðustu viku.

Geir H. Haarde utanríkisráðherra gerði ásamt embættismönnum sínum grein fyrir stöðunni í viðræðunum á fundi utanríkismálanefndar Alþingis í gær.

Halldór Blöndal, Sjálfstæðis­flokki, formaður nefndarinnar, segir að ráðherrann hafi sett nefndina inn í málin og ákveðið hefði verið að hittast síðar. "Ekkert hefur gerst síðan samningamenn komu heim. Ég hef trú á að viðræðurnar leiði til niðurstöðu sem báðir aðilar geti sætt sig við," segir Halldór.

Siv Friðleifsdóttir, vara­formaður utanríkismálanefndar, vill ekkert tjá sig um málið.

Össur segir enga fundi fyrirhugaða. "Mér virðist sem beðið sé eftir því að Bandaríkjamenn kveðji til fundar. Ég get heldur ekki séð annað en að það hafi orðið töluverð stefnubreyting hjá Bandaríkjamönnum. Það er með ólíkindum að sendinefnd okkar skuli vera komin vestur um haf og fái þá fyrst pata af tillögum varðandi kostnað sem bersýnilega eru víðs fjarri því sem íslensk stjórnvöld geta sætt sig við.

Varnarsambandið við Bandaríkjamenn er í uppnámi. Það er ekki hægt að orða það öðru vísi," segir Össur.

Steingrímur segir vont að óvissan um varnarsamningin hangi yfir þjóðinni. "Það hefur engin bókun við varnarsamninginn verið í gildi síðan 2001 og því geta Bandaríkjamenn ráðið sjálfir hvernig vörnunum er háttað," segir Steingrímur J. Sigfússon.