Endurgreiddi 50 milljónir

Þróunarsamvinnustofnun Íslands greiddi rúmar fimmtíu milljónir króna til baka til ríkissjóðs á síðasta ári vegna hagstæðs gengis krónunnar gagnvart Bandaríkjadal. Að sögn Sighvats Björgvinssonar, framkvæmdastjóra Þróunarsamvinnustofnunarinnar, er sá hluti fjárframlaga til stofnunarinnar sem fer til þróunarhjálpar í útlöndum með gengistryggingu. Það eru um 85 prósent framlaga.

"Við gerum alla okkar samninga við samstarfsríkin í Bandaríkjadölum og ef miklar gengissveiflur yrðu gætu þær orðið til þess að við gætum ekki staðið við gerða samninga ef við hefðum ekki gengistryggingu," segir Sighvatur. Hann bendir á að gengi dollarans gagnvart krónunni hafi sveiflast úr um 110 krónum á dollara 2001 miðað við 61 krónu á dollara nú.

"Þegar gengið lækkar á íslensku krónunni eykst fjárveiting til okkar á fjáraukalögum en ef gengið vex fellur okkar krónutala að sama marki. Þetta var gert að mjög eindregnum óskum stofnunarinnar," segir Sighvatur.

Hann segir að hagstætt gengi krónunnar um þessar mundir henti stofnuninni afar vel því aldrei þurfi að óttast það að ekki verði hægt að standa við samninga.