Bótakrafa lögð fram aftur

Endurskoðaða bótakröfu upp á 2,5 milljónir króna er að finna í nýrri stefnu sem lögð var fram við í fyrir­­töku í ­máli Auð­ar Lax­ness á hend­ur Hannesi Hólm­steini Gissurarsyni í Héraðsdómi Reykjavíkur í gær. Auður stefndi Hannesi fyrir höf­und­ar­rétt­ar­brot eftir að út kom eftir Hannes bókin Halldór, en í henni er fjallað um ævi nóbels­skálds­ins Halldórs Kiljans Lax­ness. Auður er ekkja Halldórs.

Hæstiréttur vísaði í úrskurði sínum 20. september frá bótakröfu Auðar í málinu, en vísaði því að öðru leyti aftur heim í hérað til efnis­með­ferð­ar. Héraðs­dóm­ur hafði áður vísað mál­inu frá í heild.

"Í nýju bótakröfunni er ekki tekið tillit til mögulegs ávinnings Hannesar af brotinu," segir Hall­dór Helgi Backman, lög­maður Auðar, en nú er krafist 2,5 milljóna króna í stað 5 milljóna áður. Hann segir að nýrri stefnu fylgi ný kröfu­gerð, en hún verður þing­fest í Héraðs­dómi Reykja­víkur næsta fimmtu­dag. Nýja stefnan verður svo sam­einuð þeirri fyrri og málið væntan­lega tekið aftur fyrir í dómi upp úr mið­jum des­em­ber. Við fyrir­töku málsins leggur Heimir Örn Herberts­son, lögmaður Hannesar fram greinargerð sína um nýju stefnuna.