Verðvernd til hagsbóta fyrir neytendur

Fyrirtæki á heimilis- og byggingarvörumarkaði, Húsasmiðjan og BYKO, eru nú farin að bjóða viðskiptavinum sínum upp á þjónustu sem kallast verðvernd, en í henni felst að viðskiptavinurinn getur skilað vöru sem hann sér auglýsta á lægra verði, innan tuttugu daga frá kaupunum, og fengið mismuninn greiddan til baka.

Verðvernd er ekki ný af nálinni hér á landi því bæði Intersport og Elko, sem tilheyra BYKO-samsteypunni, hafa boðið upp á verðverndina um nokkurt skeið. Bæði Húsasmiðjan og BYKO byrjuðu með þessa þjónustu á þriðjudaginn og greiða þar að auki tuttugu prósent af mismuninum til baka.

Ásdís Halla Bragadóttir, forstjóri BYKO, segir góða reynslu BYKO-samsteypunnar af verðverndinni, meðal annars í Elko, hafa orðið til þess að ákveðið var að bjóða upp á þennan möguleika í verslunum BYKO.

"Mikill undirbúningur liggur að baki þessari nýjung hjá BYKO. Við leggjum áherslu á það að með verðverndinni geti viðskiptavinir treyst því að verslanir okkar keppi að því að bjóða alltaf lægsta fáanlega vöruverð á sömu eða sambærilegri vöru. Okkur fannst mikilvægt að bjóða einnig upp á verðverndina á sambærilegri vöru því margar vörutegundir í verslunum okkar eru ekki þær sömu og annars staðar. Þannig er til dæmis hægt að bera saman skrúfur eða tréplötu við okkur vöru, sem eru sambærilegar að öllu leyti, þó vörurnar séu ekki nákvæmlega þær sömu."

Steinn Logi Björnsson, forstjóri Húsasmiðjunnar, segir aukna samkeppni hafa kallað á að fyrirtækið brygðist við. "Það er hluti af okkar stefnu að bjóða alltaf jafn gott eða betra verð heldur en samkeppnisaðilarnir. Það eru mörg ný fyrirtæki komin inn á markaðinn og það er í raun orðið svolítið erfitt að fylgjast með því hvernig verðlagið er í öllum verslunum. Nú viljum við fá almenning í lið með okkur til þess að fylgjast með verðlagningu fyrirtækjanna og halda okkur á tánum."

Jóhannes Gunnarsson, formaður Neytendasamtakanna, segir verðverndina ekki skipta sérstaklega miklu máli fyrir hinn almenna neytanda en segir hana þó vera ágætan kost.

"Ég held að verðverndin skili fremur litlu til neytenda þegar upp er staðið. Ég myndi vilja sjá að harðnandi samkeppni skilaði sér í lækkuðu vöruverði, um leið og gæðin eru tryggð. Það mætti koma skýrar fram fyrir neytendur hvað átt er við með sambærilegri vöru þegar verðverndin er annars vegar."