Íhuga bann við innflutningi á skrautfuglum og gaukum

Til athugunar er í landbúnaðarráðuneytinu að banna innflutning á lifandi páfagaukum og skrautfuglum, að sögn Halldórs Runólfssonar yfirdýralæknis. Hann segir enga ákvörðun enn hafa verið tekna en það sé á hendi landbúnaðarráðherra.

Yfirdýralæknir segir að bannið sé eitt af því sem komi verulega til greina sem ein af varnaraðgerðum gegn fuglaflensunni. Evrópusambandið sé nýbúið að setja slíkar reglur um bann á innflutning við lifandi fuglum vegna uppákomunnar í Englandi.

Í síðustu viku drapst páfagaukur sem geymdur var í einangrunarstöð í Essex í Englandi. Hann reyndist hafa drepist úr fugla­flensu af H5N1-stofni, en sá stofn getur sýkt fólk. Komið var með fuglinn til landsins nokkru áður frá Súrínam í Suður-Ameríku og var hann settur í sóttkví með 216 fuglum frá Taívan.

Að sögn vef­útgáfu BBC hafði enginn fuglanna komist út úr stöðinni og því er talið útilokað að flensufaraldur muni kvikna út frá þessu tilfelli. "Þetta sýnir að hættan er fyrir hendi og málin eru því í nákvæmri skoðun," segir Halldór Runólfsson yfirdýralæknir.

Talsmaður framkvæmdastjórnar Evrópusambandsins staðfesti í gær að banamein þrettán álfta sem fundust dauðar í Króatíu á dögunum hefði verið fuglaflensa af H5N1-stofni. Fuglaflensa af þessum stofni hefur þegar greinst í fuglum í Rússlandi, Tyrklandi og Rúmeníu.