Stærsta mynd Baltasars til þessa

Tökur standa yfir á íslenskri stórmynd sem Baltasar Kormákur leikstýrir og skrifaði handritið að. Hann segir þetta stærsta verkefni sitt á ferlinum til þessa og vonast til að geta frumsýnt myndina fyrri hluta næsta árs. Myndin sem Baltasar er að gera heitir A Little trip to heaven, og er lýst sem dramatískri spennumynd. Tökur hafa staðið yfir í rúma viku hér á landi og síðan liggur leiðin til Bandaríkjanna. Hann áætlar að tökum ljúki í október. Baltasar telur að kostnaður við myndina verði einhvers staðar undir einum milljarði króna. Aðalleikarar myndarinnar eru ekki af verri endanum, þau Julia Stiles og Forest Whittaker, sem bæði eru stödd hér við tökur í augnablikinu, auk þess sem Peter Coyote slæst síðar í hópinn. Leikstjórinn getur ekki leynt ánægju sinni með að hafa slíkt fólk innanborðs. Hann segir að gaman sé að leikstýra þeim. Forest hafi verið uppáhaldsleikari hans í 20 ár, og hann sé að kynnast Julíu en hún sé mikið talent. Baltasar segir að auknu umfangi fylgi að sjálfsögðu aukin ábyrgð, en segir þetta að öðru leyti ekki svo ólíkt fyrri verkefnum sínum. Hann hafi leikstýrt frábærum leikurum áður og það sé ekki öðruvísi að leikstýra stjörnum þó það sé aðeins meira umstang í kringum þá. Baltasar segir að enn sem komið er sé allt á áætlun og vonast til að myndin verði tilbúin næsta vor.