Medúlla fær misjafna dóma

Nýjasta plata Bjarkar "Medúlla" hefur fengið misjafna dóma hjá dönsku pressunni á síðustu dögum. Blaðamaður Politíken er hrifinn af tilraunum Bjarkar, en segir þó að þetta verði seint hans uppáhaldsplata. Hann óttast þó að platan höfði ekki til breiðs hóps og að það verði einungis forhertustu aðdáendur söngkonunnar sem hampi þessari plötu. Viðskiptalega telur hann að Björk hafi framið harakíri eins og hann orðar það og hann segist nánast geta heyrt hljóðið frá plötuútgefendum þegar þeir skella á gangstéttinni eftir að hafa reynt að yfirgefa bygginguna með því að fleygja sér út um gluggann. Hann gefur plötunni fjórar stjörnur af sex mögulegum. Gagnrýnandi BT er ekki eins gjafmildur. Hann gefur plötunni tvær stjörnur af sex mögulegum og segir plötuna vera misheppnaða tilraun. Jótlandspósturinn er jákvæðari, en þó hálfpartinn eins og spurningamerki í framan. Hann gefur Björk fjórar stjörnur og segir plötuna vera capella plötu og að Björk hafi yfirgefið popptónlistina. Blaðið segir að platan sé mesta tilraunastarfsemi Bjarkar á ferlinum og hennar framúrstefnulegasta plata, svo mjög að hún eigi meira að segja eftir að koma hörðustu aðdáendum í opna skjöldu og það jafnvel við tíundu hlustun. Eitt blað sker sig þó úr og gefur plötu framúrskarandi dóma. Það er Weekendavisen. Í dómi blaðsins segir að með plötunni Medúlla hafi Björk náð að festa sig í sessi sem einn af mikilvægustu tónlistarmönnum samtímans, og að platan sjálf sé á meðal merkilegustu frásagna samtímans.