Ísland í 5 sæti á NM

Íslenska kvennalandsliðið í knattspyrnu skipað leikmönnum 21 árs og yngri tryggði sér fimmta sætið á Norðurlandamótinu sem lauk á Akureyri í dag. Ísland mætti þýska landsliðinu í leiknum um fimmta sætið og eftir að staðan hafði verið jöfn, 1-1, eftir venjulegan leiktíma þá sigraði Ísland í vítaspyrnukeppni, 7-6. Katrin Kliehm kom þýska liðinu yfir á 21. mínútu en markahrókurinn Nína Ósk Kristinsdóttir jafnaði metin fyrir íslenska liðið þegar átján mínútur voru til leiksloka. Þetta er glæsilegur árangur hjá íslenska liðinu sem tapaði ekki leik í mótinu en gerði jafntefli í öllum sínum leikjum sem voru allir gegn mjög sterkum þjóðum. Noregur hafnaði í sjöunda sæti eftir sigur á Englandi í vítaspyrnukeppni og Finnar höfnuðu í þriðja sæti eftir sigur á Dönum í vítaspyrnukeppni en staðan var jöfn, 1-1, eftir venjulegan leiktíma. Nína ósk Kristinsdóttir var markahæst íslensku stúlknanna með tvö mörk og þær Erna S. Arnardóttir, Dóra María Lárusdóttir og Margrét Lára Viðarsdóttir skoruðu eitt mark hver.