Ekkert stöðvar Chelsea

Chelsea virðast ekkert ætla að gefa eftir í baráttunni um enska meistaratitilinn og eftir 0-2 sigur á Portsmouth í dag hefur liðið átta stiga forystu á toppi deildarinnar. Arsenal á reyndar leik inni og getur minnkað forystuna niður í fimm stig með sigri á Newcastle á annað kvöld. Eiður Smári Guðjohnsen byrjaði á varamannabekk Chelsea í gær en kom inn á fyrir Didier Drogba á 58. mínútu. Það var fyrst þá sem hlutirnir fóru að ganga hjá liðinu og náði Arjen Robben loks að brjóta ísinn þegar 10 mínútur voru til leiksloka. Sjaldséður Joe Cole náði síðan að bæta við öðru marki á lokamínútunum eftir að hafa komið inn á sem varamaður skömmu áður. Hermann Hreiðarsson var í sviðsljósinu í frábærum sigri Charlton á spútnikliði Everton. Fyrst fékk hann vænt olnbogaskot í andlitið frá hinum skapbráða Duncan Ferguson sem var í kjölfarið verðlaunaður með rauðu spjaldi. Hermann skoraði síðan annað mark Charlton með góðu vinstrifótarskoti eftir hornspyrnu Danny Murphy. Manchester United vann gríðarlega mikilvægan sigur gegn Aston Villa í kvöld. Ryan Giggs var í miklu stuði í leiknum og skoraði eina mark leiksins með góðu skoti undir lok fyrri hálfleiks. Liverpool er að skríða upp töfluna og í gær hafði meiðslum strjáð liðið sigur gegn Southampton á heimavelli. Það var Florent Sinama Pongolle sem skoraði eina mark leiksins. Joseph-Desire Job kom inn í byrjunarlið Middlesbrough á nýjan leik og þakkaði traustið með því að skora bæði mörk liðsins í auðveldum sigri á Norwich. Þá komst Tottenham aftur niður á jörðina eftir fimm sigurleiki í röð. Liðið náði aðeins jafntefli gegn Crystal Palace á heimavelli sínum.