Allt hægt með góðu sjálfstrausti

"Ég einbeiti mér að mínu starfi með U21 árs liðinu og vona að draumurinn um að komast í A-landsliðið komi síðar," segir Hannes Þ. Sigurðsson, leikmaður með Víking í Noregi, en hann hefur staðið sig vonum framar með íslenska U21 árs landsliðinu og hefur skorað öll sex mörk liðsins í riðlakeppninni. Spurningar hafa vaknað upp hvort ekki sé þörf fyrir slíkan mann í aðalliði Ásgeirs og Loga en Hannes segir það ekkert sérstakt keppikefli eins og sakir standa. Hannes spilaði afbragðsvel ásamt liðinu öllu þegar góður 3-1 sigur vannst á U21 árs liði Svía í Grindavík á þriðjudaginn var. "Heppni er alltaf hluti af þessu en gegn Svíum var allt liðið að spila vel og þess vegna fékk ég góð tækifæri til að skora," segir Hannes, en liðið hefur nú unnið tvo leiki og tapað tveimur. "Þetta var bara okkar dagur. Við vorum allir frískir og náðum þeim leik sem við vildum. Létum þá lítið stjórna spilinu og niðurstaðan var okkur í hag. Við vissum alltaf að okkar lið var ekki verra en það sænska og þegar sjálfstraustið er í góðu lagi eins og þarna var er allt hægt." Hannes hefur leikið fyrir norska liðið Víking frá Stafangri um tíma en samningur hans við liðið rennur út í desember. Hann vill ekki gefa upp hvað tekur við eftir það en hann hefur fengið færri tækifæri með Viking en hann vonaðist eftir. "Ég hef ekki fengið eins mörg tækifæri og ég vildi. Þeir vilja þó hafa mig áfram og hafa boðið mér áframhaldandi samning en ég ætla að taka mér góðan tíma til að taka ákvörðun." Hannes vill ekki gefa upp hvort önnur félög hafi sóst eftir hæfileikum hans en víst er að sex mörk í tveimur U21 árs landsleikjum auka möguleika á að fleiri félög hugsi sér gott til glóðarinnar. "Ég er ekkert að flýta mér að taka ákvörðun. Það hafa orðið breytingar hjá Víking eftir að Roy Hodgson tók við þjálfun liðsins og verið getur að ég fái fleiri tækifæri en verið hefur en slíkt mun að sjálfsögðu hafa áhrif á ákvörðun mína þegar þar að kemur." Lið Víking er í botnbaráttunni í norsku deildinni en þarf að líkindum aðeins einn sigur í þeim fjórum leikjum sem eftir eru til að bjarga sér af hættusvæðinu.