Auglýsti eftir fjölskyldu

"Eldri kennari á eftirlaunum óskar eftir fjölskyldu sem er reiðubúin að ættleiða afa. Er fús að greiða fyrir." Svona hljómar einkamálaauglýsing sem birtist í sunnudagsútgáfu ítalska dagblaðsins Corriere della Sera. Giorgio Angelozzi er 79 ára, og hann hefur búið einn með sjö köttum skammt frá borgarmörkum Rómar frá því að eiginkona hans lést árið 1992. Eins og gefur að skilja hefur Giorgio verið nokkuð einmana, og það leiddi til þess að hann birti einkamálaauglýsingu í Corriere della Sera, þar sem hann hét því að greiða 500 evrur, eða um fjörutíu þúsund krónur, á mánuði til fjölskyldu sem fús væri að ættleiða hann. Auglýsingin snart margan Ítalan djúpt, og viðbrögðin létu ekki á sér standa. Giorgio hefur fegið tugi tilboða víða að frá fjölskyldum sem vilja endilega að hann flytji inn og kenni bæði börnum og barnabörnum klassísk fræði. Kennarinn gamli segist aldrei hafa látið sér detta í hug að viðbrögðin yrðu með þeim hætti sem raun ber vitni, en segist einnig vita að hann sé ekki einsdæmi: fjöldi eldri Ítala lendi á hálfgerðum vergangi þar sem að lífsmunstur hafi breyst mjög á undanförnum árum og áratugum. Þó að Giorgio hafi fengið fjölda tilboða fylgir ekki sögunni hvort og þá hverju þeirra hann hafi tekið.