Anita Briem í spænskri hrollvekju

"Þetta er frábært tækifæri," segir leikkonan Anita Briem en hún er nú stödd á Spáni þar sem hún leikur aðalhlutverk í nýrri kvikmynd sem ber heitið La Monja eða Nunnan. "Ég leik sautján ára bandaríska stelpu sem leggst í að rannsaka fortíð móður sinnar eftir að hún er drepin á dularfullan hátt," segir Anita. "Móðirin hafði á sínum yngri árum verið í skóla á Barcelona og dóttirin heldur þangað til að afla sér upplýsinga og þá fer af stað undarleg atburðarás." Flestir leikararnir eru spænskar sjónvarps- og kvikmyndastjörnur þar sem meirihluti myndarinnar gerist á Spáni. En kvikmyndin, sem er í leikstjórn hins spænska Luis de La Madrid, er leikin á ensku og framleidd með Bandaríkjamarkað í huga. Anita Briem útskrifaðist frá breska leiklistarskólanum Royal Academy of Dramatic Art nú í júlí. Hún hefur unnið með umboðsmanninum Jeromy Conway síðan í janúar og farið í nokkrar prufur. Áður en Anita hélt til Spánar lék hún aðalhlutverk í breskum sjónvarpsþætti sem ber heitið Doctor og verður sýndur á BBC um jólin. "Það var viku vinnutörn og mjög góð reynsla fyrir mig áður en mér var hent út í djúpu laugina hér á Spáni. Ég hef aðallega leikið á sviði og sjónvarp og kvikmyndir eru alveg ný reynsla. Ég er alin upp við að vinna fyrir mínu en hérna fær maður varla að halda á handtöskunni sinni sjálfur. Það er svolítið skrýtið að detta inn í svona stórt verkefni og venjast því að svona sé komið fram við mann áður en maður hefur á nokkurn hátt þurft að sanna sig. Það að vera innan um allt þetta klára fólk hvetur mann þó bara til að leggja sig allan fram og gera sitt besta."