Hæsti maður veraldar

Leonid Stadnyk, frá Úkraínu, er að öllum líkindum hávaxnasti maður veraldar. Hann er 2 metrar og 53 sentímetrar á hæð, eða 17 sentímetrum hærri en Túnisbúinn sem sagður er hávaxnastur í Heimsmetabók Guinnes. Þrátt fyrir fyrirhugaða heimfrægð er líf Leonid Stadnyks enginn dans á rósum. Hann er lærður dýralæknir, en sökum stærð sinnar, hefur hann ekki getað sinnt því starfi og stundar nú sjálfsþurftarbúskap í heimalandi sínu. Það gefur auga leið að allan fatnað þarf að sérsauma - og skóna þarf að vera sérsmíða, enda notar Stadnyk skó númer 60. Það er þó vart mesta vandamálið við að vera svo hávaxinn. Stadnyk segist aðeins geta ferðast í hestvagni því strætisvagnar séu svo yfirfullir að hann geti ekki fundið aukasæti. Hann segist aldrei hafa reynt að komast inn í venjulegan bíl. Læknar fjarlægðu æxli úr heila Stadnyks þegar hann var fjórtán ára. Afeiðingarnar urðu þær að framleiðsla vaxtarhormóna jókst verulega og sjón hans verður sífellt daprari. Skoskir og bandarískir læknar hafa boðið Stadnyk frekari meðferð til að bæta úr þessum sjaldgæfu hliðarverkunum, en þrátt fyrir að hann sé 34 ára er hann enn að vaxa. Hann hefur bætt 20 sentímetrum við hæð sína á síðustu fjórum árum. Haldi áfram sem horfir gæti hann orðið hávaxnasti maður sem nokkru sinni hefur lifað. Þess má geta að hæsti maður Íslands var Jóhann Svarfdælingur. Hann var 2 metrar og 34 sentímetrar á hæð, eða 19 sentímetrum lægri en Stadnyk.