Barði á Panorama

Leikstjórinn Ragnar Bragason er staddur í lest í Skotlandi þegar blaðamaður slær á þráðinn til hans. Ferðinni er heitið á kvikmyndahátíðina í Edinborg þar sem heimildarmynd hans, Love is in the Air, hefur verið valin til sýningar. Það er þó önnur kvikmynd sem er til umræðu hér því ný mynd eftir Ragnar sem ber titilinn Hver er Barði? verður frumsýnd á Nordisk Panorama, sem haldin verður hér á landi dagana 27. og 28. september. "Kveikjan að myndinni var upphaflega sú að erlent plötufyrirtæki óskaði eftir kynningarefni um Barða Jóhannsson í Bang Gang og tónlist hans," segir Ragnar Bragason. "Þegar við hófum að vinna efnið ákváðum við að það væri ekkert skemmtilegt að hanga í staðreyndum og myndin er því meira og minna leikin," en útkoman er í raun mocumentary mynd eða leikin heimildarmynd sem sýnd verður í flokki stuttmynda á Panorama-hátíðinni. Ragnar segir myndina draga upp spaugilega sýn af poppstjörnumenningunni. "Poppstjörnur eru, eins og venjulegt fólk, tiltölulega óáhugaverðar ef þær koma til dyranna eins og þær eru klæddar. Þess vegna þurfa stjörnur, eins og bara David Bowie og Björk, að búa sér til ákveðna ímynd og fara í ákveðinn karakterleik en í myndinni er Barði er í rauninni að búa til sína eigin poppstjörnupersónu." Ragnar segir vinnsluna á Hver er Barði? hafa tekið tvö ár en leikstjórinn botnar sjálfur ekki í því hvað Barða gengur til með myndinni. "Ég verð að segja að mér finnst Barði nokkuð djarfur að leyfa mér að fara þessa leið því þarna er ekkert dregin neitt sérstaklega góð mynd upp af honum."