Að hrökkva eða stökkva

Á mánudaginn gerist sá merki viðburður að hljómsveitin The Prodigy gefur út nýja plötu. Spennan í kringum Always Outnumbered, Never Outgunned, er enn meiri vegna þess að 7 ár eru frá því að síðasta plata kom út. Það þýðir að þeir aðdáendur sem voru 13 ára þegar The Fat of the Land kom út eru í dag orðnir 20 ára. Meira að segja ritstjóri Prodigy-blaðsins (sem svo þróaðist út í tónlistartímaritið Sánd) mun hlusta á hana með fyrirvara. Það er því töluverð pressa á höfuðpaurnum Liam Howlett að standa sig í þetta skiptið. Aðdáendur eiga líklegast ekki eftir að fyrirgefa svo langa fjarveru nema nýi gripurinn hreyfi við þeim. Almenningur varð svo var við óöryggi Howlett fyrir tæpum tveimur árum síðan þegar plötunni var skyndilega frestað þrátt fyrir ágætar vinsældir lagsins Babys Got a Temper. Sagan segir að Howlett hafi verið hundóánægður með vinnu sína og hent lögum sem hefðu getað fyllt heila plötu og byrjað upp á nýtt. Nýja platan heitir þó sama nafni þrátt fyrir að vera ekki sú plata sem hefði komið út fyrir tveimur árum síðan. Aðdáendum The Prodigy á svo eftir að finnast enn undarlegra að enginn annar liðsmaður sveitarinnar fyrir utan Liam Howlett kom að gerð plötunnar. Undrabarnið gerði allan gripinn á ferðatölvuna sína og kaus að fá vini sína til þess að syngja í stað Keith Flint, Maxim eða Leeroy Thornhill, sem eiga að teljast liðsmenn sveitarinnar. Þess í stað eru það leikkonan Juliette Lewis og bræðurnir Liam og Noel Gallagher sem sjá um að syngja. Það má líklegast ætla að yngri Gallagherbróðirinn sé tíður húsgestur hjá Liam Howlett þar sem þeir eru giftir Appleton-systrunum sem slógu í gegn með All Saints hér forðum. Rapparinn Twista kemur svo fram í einu lagi, hann er kannski barnapían þeirra? Hvernig sem fer þá geta Íslendingar átt von á því að fá færi á að sjá The Prodigy á tónleikum því Fréttablaðið hefur áreiðanlegar heimildir fyrir því að sveitin haldi tónleika hér um miðjan október. Það verða fimmtu tónleikar sveitarinnar hér á landi og því er hægt að fullyrða að engin erlend stórsveit hefur leikið jafn oft fyrir Íslendinga. Fyrst spiluðu þeir í Kaplakrika um vorið 1995 og svo aftur síðar það sama kvöld í Tunglinu við Lækjargötu, þar sem nú er Iða. Sama ár komu þeir aftur og léku á útihátíðinni Uxa á Kirkjubæjarklaustri um verslunarmannahelgina ásamt Björk. Síðustu tónleikar þeirra voru svo haldnir í Laugardalshöll árið eftir. Af hverju ærslafull tónlist The Prodigy höfðar svona vel til Íslendinga verður okkur líklegast hulin ráðgáta áfram. Aðdáendur sveitarinnar eru því líklegast með hnút í maganum því á mánudaginn mun almenningur byrja að kveða upp dóm sinn um nýju plötuna.