Lou Reed á Menningarnótt

Rokkgoðsögnin Lou Reed kemur til landsins á morgun en hann heldur sem kunnugt er tónleika í Laugardalshöll á föstudagskvöld. Reed er orðinn mjög áhugasamur um land og þjóð og þannig hefur hann lengt ferð sína í báða enda en fyrst ætlaði hann að koma til Íslands á fimmtudag eða jafnvel föstudag og fljúga út strax á laugardag. Hann hefur hins vegar ákveðið að nota fimmtudaginn til að bregða sér út á land og áhugi hans á Menningarnótt í Reykjavík er slíkur að hann ætlar að lyfta sér á kreik á laugardaginn og flýgur ekki heim fyrr en á mánudag. Það má því búast við að gamla brýnið skjóti upp kollinum í mannhafinu á menningarnótt en heyrst hefur að frægur listamaður verði í för með honum þannig að mörgum íslenskum listamanninum gæti þótt fengur í því að fá Reed og félaga inn á gafl til sín á laugardaginn.