Pink með flottasta sjóið á Íslandi

"Pink mætti til landsins í gærdag og fór þá beint upp á hótel til að slappa af og safna kröftum fyrir tónleikana í kvöld," segir Lilja Björk Jensen starfsmaður hjá L Promotion, fyrirtækinu sem flytur söngkonuna Pink til landsins, en sem kunnugt er verður Pink með tónleika í Laugardalshöllinni í kvöld. Íslenskt öryggisfyrirtæki tók á móti Pink á flugvellinum og fylgir henni hvert fótmál hér á landi. "Hún verður hér í tæpa viku og fer týpíska túristarúntinn með öllu sínu fylgdarliði. Það er búið að ákveða að hún fer að sjá Gullfoss og Geysi og í Bláa lónið en svo ætlar hún bara að skoða sig um í bænum og fara í gokart hjá Icekraft. Pink finnst landið ferlega töff og hún og allir í fylgdarliðinu eru sérstaklega ánægð með hitabylgjuna sem tók á móti þeim í gær." Lilja segir að búið hefði verið að selja um 5.500 miða í fyrradag svo höllin er full. "Pink mætti í vinnuna í morgun og er búin að vera að æfa sig og skoða aðstæður. Pink er löngu búin að lofa okkur því að þetta verði flottasta sjóið sem haldið hefur verið á Íslandi og ljósabúnaðurinn sem hún notar í Laugardalshöll er sá flottasti sem hefur verið notaður á tónleikum á Íslandi." 300 manna V.I.P partí verður svo haldið á Felix eftir tónleikana þar sem Pink, sem heitir réttu nafni Alecia Moore, verður án efa í miklu stuði.