Kallið barst frá bíl í byggð

Neyðarkall sem barst í síðustu viku um að tuttugu manna hópur Frakka væri í nauðum staddur á hálendinu barst úr bíl í byggð á Suðurlandi. Gabb sem þetta er refsivert og biður lögreglan hvern sem getur veitt upplýsingar að hafa samband. Það var síðastliðinn fimmtudag sem neyðarkall barst í gegnum talstöð um að tuttugu frakkar á hálendinu væru veikir af matareitrun. Umfangsmikil leit var sett í gang, en hún bar engan árangur. Lögregla fór þá að reyna að miða út frá styrk neyðarkallsins hvaðan það kom. Jónína Sigurðardóttir, aðstoðaryfirlögregluþjónn, segir að farið hafi verið yfir svæðið og gerðar fjarskiptaprófanir, til að athuga hvaðan tilkynningin barst og var komist að þeirri niðurstöðu að hún hafi komið úr bíl úr byggð á Suðurlandi. Sú tilkynning segir Jónína að hafi ekki verið á rökum reist og verði héðan af litið á þetta sem lögreglumál. Verknaðurinn varðar hegningalög þar sem segir að ef maður gabbar lögreglumenn, brunalið, björgunarlið eða annað hjálparlið, með því að kalla eftir hjálp að ástæðulausu eða með misnotkun brunaboða eða annarra hættumerkja, þá varðar það sektum eða allt að þriggja mánaða fangelsi. Ljóst er að kostnaðurinn við leitina hleypur á milljónum króna.