Möl ekið í stíflugarð

Aka þurfti miklu af möl og grjóti í þrjá daga í stíflugarð við hjáveitugöng við Kárahnjúka um helgina vegna mikilla vatnavaxta í Jöklu, en verktakar og eftirlitsmenn telja þó ekki hættu á ferðum. Skyndilega tók að hækka í Jöklu á föstudag og hækkaði yfirborð hennar um heila þrjá metra á stuttum tíma. Þá þegar var hafist handa við að aka möl og grjóti utan á garðinn til að þétta hann og styrkja, þó aðallega þétta, þar sem garðurinn var farinn að leka. Á laugardagsmorgun, þegar menn mættu til vinnu á svæðinu fyrir neðan stífluna, var þar orðið hálfs annars metra djúpt vatn vegna lekans og var því dælt í burtu með öflugum dælum. Enn vatnaði þó níu metra upp á að vatn flæddi yfir sjálfa stífluna. Nú hefur vatnið ofan stíflu sjatnað um fimm metra af þeim níu sem það reis á föstudag, en hætt er við að vatnsveðrið eystra í nótt eigi eftir að skila sér í Jöklu og verktakarnir búast við jafnvel enn meiri vatnshæð síðar í þessum mánuði, en varð um helgina. Sjónarvottur, sem þekkir til þessháttar mannvirkja sagði í viðtali við Fréttastofuna að óneitanlega mætti líta svo á að vatnsmagnið í Jöklu hafi verið vanmetið áður en ummál ganganna var ákveðið þar sem gangamunninn hafi verið langt undir yfirborði vatnsins, þegar það steig sem hæst, en þeir sem að verkinu standa vilja ekki kannast við það.